Энэ удаагийн уулзалт Нийгэм хангамжийн салбарт хамтран ажиллах тухай Монгол Улсын Засгийн газар, Бүгд Найрамдах Казахстан Улсын Засгийн газар хоорондын хэлэлцээрийн хүрээнд байлаа.

Уг хэлэлцээрийг 1993 оны 10 дугаар сарын 22-ны өдөр Улаанбаатар хотноо байгуулж байсан билээ. Хэлэлцээр Монгол улсын иргэн харъяатаас гарч буй, мөн буцан ирж буй казах иргэдийн нийгмийн даатгал, тэтгэвэр, тэтгэмжийн холбоотой багц асуудлыг шийдвэрлэх зорилготой юм.  Гэвч өнгөрсөн хугацаанд хоёр талын хамтын ажиллагаа тогтмолжоогүй, нийгмийн даатгалын тогтолцоонд хууль эрх зүй багагүй өөрчлөлт гарснаас шалтгаалан эргэж харах, хамтран шийдвэрлэх шаардлагатай олон асуудал хуримтлагдаад байгаа юм.

Тухайлбал хэлэлцээрийн 6 дугаар зүйлийн 2-т “тэтгэвэр авагчийн тэтгэврийг хүрэлцэн ирсний нь дараагийн сараас эхлэн түүнийг хүлээн авч буй талын эрх бүхий байгууллагууд олгоно” гэсэн заалт  хэрэгжихгүй байгаагаас 2 талд тэтгэвэргүй болох зэргээр иргэд хохирох асуудал гарсаар байгаа юм.

Иймд тулгамдаад байгаа асуудлаа хамтран хэлэлцэж, шинэ шийдэлд хүрэх зорилгоор 2013 оны 03 дугаар сард Баян-Өлгий аймагт уулзалт зохион байгуулах тов зарлалаа.

Уулзалтад Монгол Улсаас Нийгмийн даатгалын ерөнхий газрын удирдлага, холбогдох албан тушаалтнууд нөгөө талаас Бүгд Найрамдах Казахстан Улсын Элчин сайдын яам, тус улсын нийгмийн хамгааллын салбарын холбогдох албаныхныг байлцуулах шаардлагатай гэж үзлээ.

Өнөөдрийн уулзалтад Нийгмийн даатгалын ерөнхий газрын даргын албан үүргийг түр орлон гүйцэтгэгч Ц.Уртнасан, Нийгмийн даатгалын бодлогын хэрэгжилтийн газрын дарга Ц.Дашдондог, Тамгын газрын дарга Р.Наранцэцэг, Гадаад хамтын ажиллагааны хэлтсийн ахлах мэргэжилтэн Б.Батжаргал, Бүгд Найрамдах Казахстан Улсаас Монгол улсад суугаа Элчин сайдын хэргийг түр хамаарагч ноён Кадиров Данияр, ЭСЯ-ны консул  Нуракын  Дин-Мухаммед, Элчин сайдын яамны мэргэжилтэн, орчуулагч Н. Жансауле нар байцлаа.