Азийн орнуудын ажилчдын ослын даатгалын дээд форумын II ерөнхий чуулганд Монгол улсыг төлөөлж улсын Нийгмийн Даатгалын Ерөнхий Газрын дарга Цэцэгмаагийн Уртнасан тэргүүтэй нийгмийн даатгалын байгууллагын төлөөлөгчид амжилттай оролцлоо.
Уг чуулганд Монгол Улс, БНСУ, Вьетнам, Малайз, Индонези, Лаос, Филиппин, Комбожи, Шри Ланк, Тайланд улсын ижил чиг үүрэгтэй байгууллагын төлөөлөл оролцож ослын даатгалын үйл ажиллагаатай холбоотой туршлага солилцсон.
Чуулганы үеэр шийдэх нэг асуудал нь Азийн орнуудын ажилчдын ослын даатгалын дээд форумын ерөнхийлөгч, дэд ерөнхийлөгч нарыг сонгох ажил байсан бөгөөд Монгол улсын Нийгмийн Даатгалын Ерөнхий газрын дарга Ц.Уртнасан дэд ерөнхийлөгчөөр нэр дэвшиж сонгогдлоо.
Азийн орнуудын ажилчдын ослын даатгалын дээд форумын Дэд ерөнхийлөгч Ц.Уртнасан уг форумд хэлсэн үгэндээ тус улсын нийгмийн даатгалын шинэтгэлийн чиглэлээр дэлхийн улс орнууд түүний дотор Азийн улс орнуудтай хамтран ажиллах, туршлага солилцох, хамтдаа хөл нийлүүлэн алхах чин эрмэлзэлтэй байгааг Ази тивийн улсуудад илэрхийлэв.
Мөн Монгол улсын Үйлдвэрлэлийн осол, мэргэжлээс шалтгаалсан өвчний даатгалын сангийн үйл ажиллагаа, хуулийн зохицуулалт, давуу талууд зэргийг агуулсан илтгэлийг энэхүү чуулганд тавьсан.
Мөн БНСУ-ын ажилчдын нөхөн олговор, халамжийн үйлчилгээний газар болон БНСУ-ын Үндэсний тэтгэврийн албаны удирдлагатай ажил хэргийн уулзалт хийлээ.
Тухайлбал, БНСУ-ын ажилчдын нөхөн олговор, халамжийн үйлчилгээний газрын тэргүүн Lee Jae Kap-тай ажлын уулзалт хийж дараах асуудлаар санал солилцов. Үүнд:
- Монгол Улс болон Бүгд Найрамдах Солонгос Улсын Засгийн газар хоорондын байгуулсан нийгмийн хамгааллын тухай хэлэлцээрийн хүрээнд хоёр улсын иргэнийг ажилгүйдлийн даатгалаас чөлөөлөх;
- 2009 онд байгуулсан санамж бичгийг шинэчлэж, хамтын ажиллагааг идэвхижүүлэх;
- Тус улсын холобгдох эрх зүйн орчинг судлах, туршлага судлах ажлыг зохион байгуулах,
БНСУ-ын ажилчдын нөхөн олговор, халамжийн үйлчилгээний газрын тэргүүн Lee Jae Kap саналыг хүлээн авч хамтран ажиллахаа илэрхийлсэн болно.
БНСУ-ын Үндэсний тэтгэврийн албаны Олон улсын төвд ажлын айлчлал хийж ноён Kim Young-Eil, Kim Kyung-Sik болон бусад ажилтнуудтай ажлын уулзалт зохион байгуулж дараах асуудлаар санал солилцов. Үүнд:
- Монгол Улс болон Бүгд Найрамдах Солонгос Улсын Засгийн газар хоорондын байгуулсан нийгмийн хамгааллын тухай хэлэлцээрийг хоёр тал сайтар сурталчлан ажиллах;
- БНСУ-ын хуулийн дагуу олгож буй тэтгэврийн даатгалын шимтгэлийн буцаан олголтын ажлыг эрчимжүүлэх;
- Хоёр байгууллагын хооронд байгуулсан санамж бичгийн хэрэгжилтийг дүгнэх, ажилтнуудыг харилцан солилцон айлчлуулж, мэдээлэл туршлага солилцох;
- Монгол Улсын Засгийн газар тэтгэврийн тогтолцоог шинэчлэх зорилт тавьж ажиллаж байгаа бөгөөд энэхүү шинэчлэлийг хийхэд БНСУ-ын тэтгэврийн даатгалын тогтолцоог шинэчлэх талаар хийсэн ажил, үр дүн, туршлагыг судлах, нийгмийн даатгалын ажилтнуудыг энэ чиглэлээр мэргэшүүлэх зайлшгүй шаардлага байгаа тул тодорхой тооны ажилтнуудыг тус улсад сургах.
БНСУ-ын Үндэсний тэтгэврийн албаны Олон улсын төвийн захирал Kim Young-Eil дээрх саналуудыг хүлээн авч хамтран ажиллахаа илэрхийлэв.
